මනුමි සියත්‍රා අපට පාඩමක් කියා දී මෙලොවින් සමු ගනී

පොඩි දරුවන් වෙසෙන වෙසෙන නිවසක සිව් කොනේ ආරක්ෂාව ගැන නිරතුරුවම අවධානයෙන් සිටීමෙන් මනුමි සියත්‍රා පුංචි දියණියට අත් වූ ඉරණම ආයෙ කාටත් අත් නොවන්නට උපකාර වන්නට පුළුවන්.

අකලට මිලින වූ මල් කැකුලකගේ දුක්බර පුවතක් ගණේමුල්ල පහළයාගොඩ නිවසකින් වාර්තා වනවා. පසුගිය පොසොන් දින වයස අවුරුදු හතරක් පමණක් වයසැති මනුමි කාමරයේ සිටි අවස්ථාවේ ඇගේ මව සිටියේ ඊට යාබදව ගේ ඇතුලෙම ඇති නාන කාමරයේ මනුමිගේ ඇඳුම් දෙකක් සෝදමින්. මනුමි ඒ ඩිංගට පුටුවක් තබා ඊට නැග අල්මාරියේ තිබු අම්මගේ බෙහෙත් පෙති දහයක්ම එක වර බීලා.

මනුමිගේ පියාට අනුව මේ පෙති මනුමිගේ මවගේ අතේ කැක්කුමකට දුන් යකඩ අඩංගු බෙහෙත් පෙති වර්ගයක්. මනුමි පෙති ටික බීල අම්මට ඇවිත් කියල තියෙන්නේ ඇය වැරදීමකින් බෙහෙත් පෙති සියල්ල බිවු බවත් දැන් ඇයට වමනයට එන බව හා නිදිමත ඇති බවත්ය.

මෙය අසා ඇයව වහාම ගම්පහ මහ රෝහලට ඇතුළත් කර ඇති නමුත් දැඩි සත්කාර ඒකකයේ ප්‍රතිකාර ලබමින් සිටියදී පෙරේදා දහවලේ ඇය මිය ගොස් තිබෙනවා.

හිරු ගොසිප් ඔස්සේ වාර්තා වුනු මේ  අවාසනාවන්ත සිද්ධිය ඉතා කෙටි කාලයක් ඇතුලත නොසිතූ වෙලාවක නොසිතු ලෙස සියල්ලෝ නිවසේ සිටි සොඳුරු පොසොන් නිවාඩු දවසක සිදු වූ ඉතා දුක්බර පුවතක්.

මනුමි සියත්‍රා මෙනෙහි කර ඇයගේ ආත්මය වෙනුවෙන් සෙත් පතන අතර මෙයින් දෙමාපියන්ට ගත හැකි  කරුණු කිහිපයක් සලකා බලමු.

දෙමාපියන්ට දරුවන්ගේ ආරක්ෂාව සඳහා නිවෙස සකස් කර ගත හැකි  මාර්ග කිහිපයක් සලකා බලමු.

1. නිවසේ සිවු කොනේම දරුවාට සුරක්ෂිත බව තහවුරු කිරීම.

බොහෝ දෙමාපියන් දරුවන් සිටින නිවෙස් තුල කැඩෙන බිඳෙන බඩු අයින් කර හැකි තරම් බඩු අඩු කරනවා. මෙය විවාධාත්මක අදහසක්. මොකද ඇතැම් මා පියන්ගේ අත් දැකීම නම් දරුවාට සුරක්ෂිත පරිදි නිවස හැඩ ගැසිය යුතු නමුත් දරුවාට නිවසේ අනෙකුත් බඩු මුට්ටු, විසිතුරු දෑ අයින් කිරීමෙන් දරුවා පිට නිවෙස් වලට ගොස් බඩු මුට්ටු අත පත ගෑමට යුහුසුළු වන බවයි.

මේ කියන්නට යන්නේ දරුවා සුරක්ෂිත වන පරිදි ගේ දොර සකස් කිරීම ගැනයි. සැම අහු මුල්ලකම පිරික්සා නිවෙස දරුවාට අතිශයින් සුරක්ෂිත ලෙස සකසා ගත හැකියි. ඊට සරිලන අදහස් කිහිපයක් මෙසේ හුවා දක්වමු.

  1. මේසය මත තබන විසිතුරු මල් බඳුන විදුරු එකක් වෙනුවට ප්ලාස්ටික් හෝ රෙදි මල් යනාදී එකක් විය හැකියි.
  2. ජනෙල් දොරවල් දරුවාට අරින්නට නොහැකි පරිදි safety lock වර්ග සවි කල හැකියි.
  3. දොරවල් ඉබේ නොවැසෙන සේ දොර පාලක උපාංග (door guard) පාවිච්චි කල හැකියී. මෙයින් දරුවාගේ අත, ඇඟිලි දොරට හසු වීම වලක්වාගත හැකියි.
  4. උණු වතුර, බිඳෙන දේවල්, අහිතකර ගේ දොර පිරිසිඳු කිරීමේ ද්‍රව්‍ය, සෝදන කුඩු යනාදී සෑම සියළු දෙයක්ම අගුල්ගත කල කබඩ් වල හෝ දරුවාට කිසි සේත් ලඟා විය නොහැකි උසකින් තැබිය යුතුයි.
  5. ඉලෙක්ත්රොනික් වයර්, උපාංග, විදුලි ස්විට්ච් ආදිය දරුවාට කිසි සේත්ම ලඟා විය නොහැකි පරිදි ආවරණය වන සේ තැබිය යුතුයි

2. අප දරුවාට දෙන ආදර්ශය ගැන නිරතුරුවම අවබෝධයෙන්අ සිටිය යුතුයි. 

අපි පුංචි දරුවන්ට කෙතරම් ඔවදන් දුන්නද, දරුවා වැඩිමනක් දේ ඉගෙන ගන්නේ වැඩිහිටි අයව අනුකරණය කිරීම තුළින්. අවවාදයට වඩා ආදර්ශය උතුම් යැයි ප්‍රසිද්ධ කියමනක් තියෙන්නේ මේ නිසා වන්නට ඇති. විශේෂයෙන්ම වයස අවුරුදු පහට අඩු දරුවන් වැඩි වැඩියෙන් අනුකරණයේ යෙදෙනවා. අම්ම තාත්තගේ ඇඳුම් ඇඳන් ඔවුන් වාගේ නිරතුරු හැසිරෙන දරුවන් බලා අපි බොහෝ විනෝද වුවත් මෙහි ගැබ්ව ඇති අරුත තේරුම් අරන් ඔවුනට හිතකර ලෙස හැසිරීම ඉතාමත්ම අමාරු නමුත් අත්‍යවශ්‍ය කරුණක්.  

 ඉහත සිද්ධියේදීද මේ පුංචි දිරිය එතරම් වෙර දරා පුටුවක් තබා නැග අල්මාරියෙන් බෙහෙත් අරන් බිව්වේ අම්මා අනුකරණය කිරීමේ මුලික අරමුණින් වන්නට ඇත.

3. දරුවා කෙරෙහි නිරන්තරයෙන්ම සාවධානයෙන් සිටීම 

අප නිතර පවසන සේ නිරන්තරයෙන්ම දරුවා ගැන අවධානයෙන් සිටීම කෙතරම් අත්‍යවශ්‍ය දැයි කියන්නට බැරි තරම්. දරුවා ළඟ හිඳිය නොහැකි වැඩක යෙදෙන්නට අවශ්‍ය විටෙක දරුවා ආරක්ෂාකාරී ස්ථානයක තබා ඉක්මනින් ඒම හෝ දරුවා ඇස ගැටෙන මායිමේ තබා ගැනීම ඉත වැදගත්. මගේ දරුවා පුංචි කාලයේ මම ඇගේ පාදයක ගෙජ්ජි නොහොත් පාද සලං වැලක් දමා තිබුනේ ඇය ඉන්නා ඉසව්ව නිරතරු දැන ගැනීමේ අරමුණින්.

ඉතින් අපට හැකි තරම් උපරිමෙයන් දරුවන් සිටින නිවෙස් ආරක්ෂාකාරීව තබා ගැනීමට මෙම ලිපිය බිඳක් හෝ ඉවහල් වේවි කියා සිතනවා.